සුමනසිරි

ෂෙල්ටන් වීරරත්න විසින රචිත බටහිර කණ්ඩායම් ගීතයේ විකාශය - එය දේශානුගත කළ නෙවිල් සහ නොයෙල් (සරසවි ප්‍රකාශකයෝ, ISBN 978-955-671-589-7) කෘතියේ 488-452 පිටු ඇසුරෙනි.

ජෝසෆ්‌ වින්සන්ට් පැට්‍රික්‌ කොරේරා, කොළඹ, චේල්ල වීදියේ සීමාසහිත ගෞරි කෝපරේෂන්‌ ආයතනයේ හිමිකරුවා විය. ගෞරි ව්‍යාපාරයේ අයිතිය පවරා ගෙන වසරක්‌ සපිරෙන දිනට කිසියම්‌ වැදගත්‌ කාර්යයක්‌ කළ යුතු යැයි ඔහු තීරණය කර තිබුණේය.

ගායක කණ්ඩායම්‌ රැල්ලේ ප්‍රථම ගීත තැටිය වශයෙන්‌, 1967 සැප්තැම්බර්‌ 1 දින සමනලයෝ ගායක කණ්ඩායමේ පළමු තැටිය සහ පිලිප්ස්‌ ලේබලය යටතේ නිකුත්වූ පළමු තැටිය ද වූ JVPC 1001 අංකය දරණ ඊ.පී. තැටිය වෙළඳපොළට නිකුත්‌ වූයේ එසේය. නමුත් පැට්‍රික් කොරේරා ගේ මුල් සැළසුම සහ පොරොන්දුව වී තිබුණේ පිලිප්ස්‌ ලේබලයේ පළමු තැටිය ලෙස නොයෙල් බ්‍රයන් රණසිංහ ප්‍රමුඛ ලා සිලෝනියන්ස්‌ ගායක කණ්ඩායමේ තැටියක් නිකුත් කිරීමට යි.[1]

කෙසේ හෝ පිලිප්ස්‌ ලේබලය යටතේ නිකුත් වූ දෙවැනි සහ තුන්වන තැටි ලෙස ලා සිලෝනියන්ස්‌ ගායක කණ්ඩායමේ තැටි දෙකක් නිකුත් කිරීමට පැට්‍රික් කොරේරා කටයුතු කළේ ය. විවේකී සැඳෑවක ලා සිලෝනියන්ස්‌ කණ්ඩායම තම නිවසට ගෙන්වා ගත්තේ ලා සිලෝනියන්ස්‌ කණ්ඩායම ශ්‍රවණ පරීක්‍ෂණයකට භාජනය කොට ඔවුන්ගේ හැකියා - දක්‍ෂතා මැන බැලීමේ අවශ්‍යතාවයෙන් නොව ඔවුන්ගේ ගීත සහ ගායනා පිළිබඳ අධ්‍යයනයක්‌ කිරීමට ය. පැට්‍රික්ගේ පවුලේ සමීපතමයන්‌ වූ හෙක්ටර්‌ සමරසේකර සහ සිල්වෙස්ටර්‌ ජෝසෆ්‌ එම අවස්ථාවට එක්ව සිටියහ. ලා සිලෝනියන්ස්‌ ගායනා කරන ගීත අතරින්‌ වඩාත්‌ සුදුසු යැයි හැඟෙන ගීත තෝරාගැනීම ඔවුන්‌ දෙදෙනාට පැවැරී තිබූ කාර්යභාරය විය.

ලා සිලෝනියන්ස්‌ කණ්ඩායම්‌ සාමාජිකයෝත්‌, අත්වැල්‌ ගායනය සඳහා කැඳවාගෙන ගිය තවත්‌ තරුණයෙකුත්‌ නොයෙල්ගේ පිරිසට ඇතුළත්‌ වූහ. කණ්ඩායම සිය ගීත එකිනෙක ගායනා කරමින්‌ අමුත්තන්‌ ඉදිරියේ ගී නිර්මාණ පෙළ ගස්වන්නට වූහ. ගායනා පිණිස තෝරාගත්‌ ගීත අතරේ දහදුක විඳලා දරු හදලා යනුවෙන්‌ ගැයෙන ගීතයක්ද තිබිණ. එය ආරම්භ කෙරෙන්නේ සංවේදනාත්මක හැඟුම්‌ දනවන ආකාරයේ කවි පද පෙළකිනි.

කරන කලට පව්‌ මිහිරිය මී සේ.....
විඳින කලට දුක්‌ දැඩිවේ ගිනි සේ.....[2]

වියපත්‌ දිළිඳු යාචකයෙක්‌ කවි ගායනයේ යෙදෙමින්‌ හිඟමන්‌ යදින සැටියක්‌ එම ගීතය මඟින්‌ නිරූපනය කෙරේ. කවි පද පෙළ ගායනා කිරීම පැවැරී තිබුණේ කණ්ඩායමේ සාමාජිකයන්ට පරිබාහිරව කැඳවාගෙන ගිය සුමනසිරි නමැති තරුණයාටය. ඔහුගේ ගායන විලාසයේ රැඳි ලයාන්විත, මධුර රිද්මයත්‌, පැහැදිලි, නිරවුල්‌, සංවේදී හඬත්‌, සියල්ලන්ගේම දැඩි අවධානය දිනා ගැනීමෙහිලා සමත්‌ වී තිබිණි. ඔහුගේ අත්‍යාලංකාරවත්‌ ගැයුමේ විශිෂ්ටත්වයෙන්‌, පැට්‍රික්‌ කොරේරා ප්‍රමුඛ ඔහුගේ හිතෛශීහු පිරිස ආස්වාදයෙන්‌ ඇළලී ගියහ. තමා අමන්දානන්දයට පත්ව ගිය අයුරු සිහිපත්‌ කරමින්‌, පැට්‍රික්‌ පවසා සිටියේ මේ ආකාරයෙනි.

This man's voice - his singing style - certainly its unbelievable.
It is so exceptional - like the velvet voice of Jim Reeves.
At that moment I decided to get Noel's permission and do a recording of this person.

මේ මනුස්සයාගෙ හඬ - ඔහුගේ ගායන ශෛලිය - සත්තකින්ම එය විශ්වාස කළ නොහැකි තරම්.
එය අත්‍යාලංකාරයි. හරියට ජිම්‌ රිවිස්ගේ මෘදු - පිවිතුරු (විල්ලුද) හඬ වගේ.
ඒ මොහොතෙම මම තීරණය කළා. නොයෙල්ගේ අවසරය ලබාගෙන මේ පුද්ගලයාගෙ ගීත පටිගත කිරීමක්‌ කරන්න.

පසුකල්හී මෙරට ගීත ක්‍ෂේත්‍රය තුළ අද්විතීය නමක්‌ දිනා ගනිමින්‌ තාරුණ්‍යයේ සිහින කුමරා බවට පත්‌ දොන් සුමනසිරි මල්ලවාරච්චි හෙවත් මිල්ටන්‌ මල්ලවාරච්චි නම්‌ ගායන ශිල්පීයාගේ ආගමනයට අඩිතාලම දැමුණු කතන්දරයේ සමාරම්භය සටහන්‌ වන්නේ එසේය. ඔහුගේ සංගීත දිවි ගමනේ ඇරඹුම පිළිබඳව වර්තමානයේ වෛවර්ණ ආකාර වූ කතන්දර ගොතා කියන ප්‍රලාපකාරයෝ සිය දහස්‌ ගණනක්‌ වෙති. එහෙත්‌ සත්‍යය වන්නේ සුවිසල්‌ කතන්දර ගොඩක්‌ නොව, කෙටියෙන්‌ කිවහැකි නම්‌ දෙකකින්‌ පැවසෙන දීර්ඝ කතාවකි.

එනම්‌, පැට්‍රික්‌ කොරේරා සහ නොයෙල්‌ රණසිංහ යන පරාර්ථකාමී මිනිසුන්‌ දෙදෙනා, මිල්ටන්‌ මල්ලවාරච්චි නම්‌ ගායකයා සංගීත ක්‍ෂේත්‍රයට හඳුන්වාදීමේ පුරෝගාමීන්‌ වූ වගයි.

මිල්ටන් මල්ලවාරච්චි ගේ ගීත හතරක් ඇතුලත් JVPC 1016 සහ JVPC 1017 අංක දරණ ශබ්දවාහිනී (ග්‍රැමපෝන්) තැටි දෙකක් ඉන් ටික කලකට පසු EXVEE ලේබලය යටතේ පැට්‍රික්‌ කොරේරා නිකුත් කළේ ය.

මේ ලා සිලෝනියන්ස්‌ කණ්ඩායම සමග මිල්ටන් මල්ලවාරච්චි ගායනා කළ දහදුක විඳලා ගීතය යි. ගීතයේ මුල සහ අවසානයේ එන කවි දෙකට අමතරව ගීතයේ තවත් පදවල මුල් කොටසද ගායනා කරන්නේ ඔහු ය. මේ ගීතය මිල්ටන් මල්ලවාරච්චි ගේ පළමුවෙන්ම පටිගත වූ ගීතය විය යුතු ය.

ගීතය මුදිත අබේගුණවර්ධනගේ (Infolanka Miyuru Gee) කාරුණික අනුග්‍රහයෙනි.

දහ දුක විඳලා
(නොයෙල් රණසිංහ / නොයෙල් රණසිංහ / ලා සිලෝනියන්ස්‌ සමග මිල්ටන් මල්ලවාරච්චි)

සටහන්:
1. JVPC යන්න සැදී ඇත්තේ ජෝසෆ්‌ වින්සන්ට පැට්‍රික්‌ කොරේරා නමේ මුල් අකුරු හතරෙනි.
2. නෙවිල් සහ නොයෙල් පොතේ එසේ සඳහන් නමුත්, ගීතයේ ඇත්තේ මෙසේ ය.
කරන කලට පව්‌ මිහිරි වෙලා
විඳින කලට ගිනි මෙන් දැවිලා
කරුමෙ ගෙවමි මහ මග බැසලා
පෙර කරුමය අද උරුම වෙලා