හිරු සඳු දහසක්

ගුවන් විදුලියේ 95වන සංවත්සරය නිසා අපි කතා කරගෙන ආ මාතෘකාව වෙනස් වුනා. සිංහල ගීත වල සඳට පවරා ඇති කාර්යයන් පිලිබඳව කතා කරමින් හිටි අපි, අජන්තා රණසිංහ ලියූ "සඳ මම නම්" ගීතය ගැන තමයි පෙරේදා කතා කළේ.

මේ ගීතයේ සඳ විසින් හිරු වර්ණනා කරන ගමන්ම තද විවේචනයකුත් එල්ල කරනවා:
ඔය දැඩි හිරු රැස් හකුලා ගන් - වෙහෙසින් හති හලනා
දුහුනන් දුගියන් අසරණයන් නොපෙලන්

හිරුගේ සැඩ බව තවත් ගීත වල සඳහන් වෙනවා. මේ එයින් මගේ මතකයට නැගුණු ගී දෙකක්:
හිරු නොව සැඩ කිරණින් මා වෙහෙසන (හිරු හිනැහෙන - චන්‍ද්‍රලේඛා, බණ්ඩාර අතාවුද)
චණ්ඩා තාප කිරණ වැදී (සනත් නන්දසිරි, විවියන් බොරලැස්ස)

කොහොම වුනත් ළා හිරු නම් සෞම්‍ය දෙයක් හැටියට තමයි ගීත සාහිත්‍යයේ සළකන්නේ.

දැස නිසා චිත්‍රපටියේ ළා හිරු දහසක් ගීතය අපට ඇහෙන්නේ නිරුදක විසින් සුන්දරී විවාහ කර ගෙන ඔරුවකින් කැන්දා ගෙන එන දර්ශනයේ පසුබිම් ගීතය ලෙසයි. මේ ගීතය චිත්‍රපටයේ හඬ පටයෙන් උපුටා ගෙන ප්‍රතිස්ථාපනය (restore) කිරීමට තරමක වෙහෙසක් දරන්නට වුණා.

සඳ මම නම් ගීතයේ "සත් බුමු පියුම්" යන යෙදුම ගුත්තිල කාව්‍යයෙන් ගෙන ඇති බවයි පෙනෙන්නේ. ළා හිරු දහසක් ගීතයේත් "සත් බුමු පියුම්" ගැන කියවෙනවා.

============================================

ළා....
ළා හිරු දහසක්
ළා....
ළා සඳ දහසක්
[[ එකවර පායා අකාසේ ]]
හද විල් තරංගයේ
සත් බුමු පියුම් පිපේ

නෑසූ ගීයක් ගයාවි කොවුලන්
නොකියූ රහසක් කියාවි බමරුන්
රෑ හඳපානේ
සිහිලස නොදැනේවි

ළා හිරු දහසක්...

සුනිල් ආරියරත්න / ප්‍රේමසිරි කේමදාස / ටී. එම්. ජයරත්න

ප්‍රතිස්ථාපනයට පෙර (1:21 ට පමණ ගීයේ කොටසක් අඩු වී ඇත)

ප්‍රතිස්ථාපනය කළ ගීතය